NBA常規賽聽日就會爆發煞科戰，咪以為已經冇嘢好睇，實情仲有好多睇頭，以下3大疑團聽日逐一為你解開！
謎１：大帝要爭得分王？
由於騎士早篤定贏得常規賽東岸冠軍，教練米克布朗為免勒邦占士步保殊同波格特後塵重傷收咧，對上3場都冇出「大帝」，希望佢以最強狀態迎接季後賽。不過據美國傳媒消息，占士將有機會喺煞科戰復出，目的係想爭得分王，皆因「大帝」暫時平均得分係29.7分，只差領先嘅雷霆杜蘭特0.4分。事實上，NBA唔係未試過出現呢個情況，最經典係93至94年球季，馬刺球星大衞羅賓遜喺煞科戰對快艇狂轟71分，最後成功後上成為得分王。
謎２：「縮水」巨無霸傷愈候命？
因傷已經抖咗超過接近2個月嘅騎士中鋒奧尼爾，據報已經傷愈可以隨時候命，占士日前更大爆奧尼爾喺養傷期間足足減咗20磅，叫大家拭目以待。至於湖人嘅拜林尋日亦開始跑步訓練，有機會喺聽日作客快艇時後備上陣，盡早搵番比賽節奏，迎接季後賽，有呢兩隻猛虎出柙，煞科戰你哋又點可以錯過？
謎３：公牛速龍鹿死誰手？
唔理你係NBA邊隊球迷，相信依家最想知都係公牛同速龍邊隊會踏上季後賽尾班車。本來公牛日前擊敗速龍，基本上大局而定，點知速龍尋日打爭氣波，以111:97大勝活塞，目前只以半場勝仗落後第8嘅公牛。
如果公牛今朝對塞爾特人有乜差池，將同速龍再次同勝同負，到時速龍將因對賽成績較佳升上第8；就算公牛今朝贏咗「綠軍」，由於佢哋最後一場作客撼第7嘅山貓，相反速龍就會主場對住無緣季後賽嘅紐約人。呢場東岸老8爭奪戰，未到最後一刻都唔知鹿死誰手！