13/04/2010

播放本新聞相關短片

公牛屠龍季後賽在望

東岸第8位易手!憑藉諾亞超水準演出,公牛尋日喺東岸老8關鍵戰,作客以104:88大勝速龍,賽後反壓對手升上東岸第8位。不過由於速龍喺對賽上有優勢,所以公牛餘下兩場仍然係生死戰!

公牛中鋒諾亞尋日趁速龍大將保殊因傷缺陣,喺內線大肆破壞,最終獨取18分19個籃板同7次助攻,加上戴歷羅斯射入全場最高嘅26分,成功帶領公牛贏波,賽後更以1場勝仗反壓速龍進佔東岸第8位,出線季後賽形勢大好。賽後諾亞表示:「我知呢場好重要,所以我打得特別落力,希望帶領公牛贏波,實現打入季後賽嘅願望。」

速龍對賽佔優仲有價講

不過戴歷羅斯賽後就叫隊友唔好鬆懈,要將嚟緊最後兩場比賽當正今季最後一場嚟打。事實上,公牛今季之前兩次對速龍都輸波,對賽上唔及對手,所以最後兩場比賽,至少要取得1場勝仗兼速龍輸波,或者贏晒先肯定可以確保東岸第8位,所以聽日主場對塞爾特人可以話不容有失,受讓4.5分絕對值得睇好!

大衞李風