本文重點
韓職開咧冇耐，筆者今次專程飛往南韓搜刮第一手好料，希望可以幫大家進一步認識呢個亞洲頂級聯賽。尋日筆者抵達仁川機場後，隨即出發往全北大本營。一到埗就收到風，原來依家南韓最紅嗰個運動員唔係邊個足球球星，反而係冰之驕女金妍兒，就連打到去英超嘅「星爺」朴智星都要行埋一邊。
據導遊先生所講，金妍兒現時係當地最具商業價值公眾人物，勁過晒所有歌手同演員，近期仲成為廣告商寵兒，連接幾個大牌子廣告，包括NIKE、韓國銀行同Samsung等，真係瓣瓣都畀佢玩晒，尤其早排攞咗冬奧金牌，據說由佢引發嘅經濟效應，就足足值5萬2,350億韓圜（約365億港元）。
首爾李聖阮韓職最紅
講番足球圈，導遊先生話南韓人民族意識較強，普遍人鍾意睇國家隊賽事，聯賽主要支持者來自地區，受歡迎程度稍有不及。值得一提係眾多外流球星入面，以朴智星最出名，不過國內當紅球星原來唔係李東國，而係FC首爾新進射手李聖阮。
筆者拎起當地報章睇睇，發現好大篇幅係報道棒球，證明呢項運動喺當地最受歡迎，其次先輪到足球及籃球。