東岸老8愈演愈激！皆因力爭東岸季後賽最後一個席位嘅速龍同公牛，尋日齊齊輸波，賽後同得38勝41負，聽日兩隊會爆發生死戰，可惜速龍主將保殊早前受傷繼續缺陣，相信公牛可上演一幕「降龍記」，受讓2.5分下盤博得過！

目前NBA只剩東岸老8一個季後賽資格未定，速龍同公牛都有機會，可惜兩隊尋日齊齊輸波。先講速龍，佢哋以101:107不敵鷹隊，輸波關鍵係第2節畀對方轟入45分，同時有陶告魯負傷披甲、大將保殊受傷缺陣，賽後教練泰安奴好無奈：「我哋嚟緊好難打，因為有兩名球星受傷，唯一可以做係盡力而為。」

速龍保殊受傷難打

同日公牛作客經過兩次加時後，以116:127不敵籃網。其實公牛喺法定時間同第1次加時都有機會贏波，可惜都未能把握。籃網贏波功臣首推新秀泰倫斯威廉士，皆因佢後備出場取得27分13個籃板同10次助攻，成為01年後，籃網首位取得「大三元」嘅新秀，賽後佢大爆收到速龍多位球員「多謝」短訊，初時都唔明，直至後來先明白係因為速龍同公牛正爭東岸第8。

雖然輸波，不過公牛主將戴歷羅斯對於聽日作客速龍仍充滿信心：「我希望輸波會令我哋變得更強壯，因為只有咁先可以打入季後賽。嚟緊最後3場波，實在唔容許再有任何犯錯。」

已經確定攞咗常規賽冠軍嘅騎士，尋日收起4名正選，主場以113:116不敵溜馬，收埋櫃桶底嘅包括主將勒邦占士，賽後教練米克布朗暗示為咗留力季後賽，「大帝」可能唔會再喺常規賽出場，聽朝鬥魔術都有少少牙煙。