金塊、公牛行運贏波！呢兩支球隊尋日分別對住分岸「一哥」湖人同騎士，本來應該冇運行，點知對方突然收起高比拜仁同勒邦占士兩大球星，益咗金塊同公牛一齊贏波，向目標行近一大步！

湖人騎士收起高比占士

已經穩奪常規賽冠軍嘅騎士，尋日作客公牛，因為驚「大帝」勒邦占士步保殊同波格特後塵，未打季後賽已經重傷，結果將「大帝」收起，只係畀佢着西裝喺場邊為隊友打氣。雖然騎士有莫威廉士射入今季新高35分，可惜最後仍以108:109不敵公牛。公牛主將戴歷羅斯、軒域治同鄧格分別有24、23同22分進帳。

賽後公牛追到同第8嘅速龍一樣係38勝40負，軒域治表示：「呢場係一場好重要嘅勝仗，我哋真係好需要。」值得一提，騎士大前鋒占美臣喺比賽中整傷右腳，嚟緊對溜馬同占士一樣上陣成疑。

至於嚟緊只要贏多1場就穩奪西岸冠軍嘅湖人，尋日亦將有傷嘅高比拜仁收起。力爭以第2種子出席季後賽嘅金塊當然唔會軟，最終憑安東尼射入31分，加上喺吹雞前成功封走費沙嘅射波，主場以98:96險勝湖人，可以話為聽日主場對馬刺打下強心針，讓6.5分上盤值博！