尼爾遜成NBA No.1教練！隨住勇士尋日作客以116:107擊敗木狼，教練尼爾遜終於取得職業生涯第1,333場勝仗，超越韋健士成為NBA史上最多「W」教練，賽後一班球員以汽水代酒淋向尼爾遜慶祝，希望呢項成就可以填補佢未曾以教練身份拎到總冠軍嘅遺憾。

勇士今季長期受傷兵困擾，幾乎全季都以殘陣應戰。雖然一早無緣季後賽，不過一班球員近期仍然搏晒命，目的就係令教練尼爾遜成為NBA史上最多勝仗教練。結果尋日呢支西岸弱旅終憑杜利華取得職業新高34分擊敗木狼，一圓尼爾遜嘅願望。

汽水代酒慶祝

當終場笛聲響起，勇士一班球員衝向尼爾遜圍住佢狂歡，返入更衣室後瘋狂慶祝，贏波功臣杜利華話：「因為我哋冇香檳，所以我哋將雪碧、Mountain Dew同水倒落尼爾遜度！」雖然一頭白髮被人淋到濕晒，但尼爾遜仍然好enjoy：「能夠打破呢項紀錄感覺真係冇得頂！」

其實又難怪尼爾遜咁激動嘅，事關佢喺NBA教咗31年波，從未攞過總冠軍，同時係NBA史上唯一一位攞到1,000場以上勝仗，仍未被選入名人堂嘅教練。難怪勇士一眾球員，賽後都表示為尼爾遜取得呢項成就，好比攞到總冠軍。

勇士主席洛維亦為尼爾遜嘅成就感到高興：「能夠達到呢個目標，對一位好教練嚟講絕對係一項極大嘅成就，我哋衷心多謝佢呢幾年帶畀我哋美好嘅回憶。」

唔在乎未入名人堂

目前尚執教鞭嘅NBA教頭中，爵士教練史龍有1,187場勝仗，湖人「禪師」積遜就有1,095場，對於驚唔驚自己嘅紀錄有朝一日會被打破，尼爾遜表現得一啲都唔在乎：「NBA有好多教練都好近我嘅紀錄。佢哋一季好多時都可以攞到50至60場勝仗，唔同我一季得20場勝仗，只要佢哋教多幾年，要破我紀錄唔難。」

單係呢份知足常樂，攞唔攞到總冠軍，其實對佢呢位69歲嘅老人家嚟講，又有乜所謂呢？

尼爾遜小檔案

年齡：69歲

曾執教球隊：公鹿（76-87）、紐約人（95-96）、小牛（97-05）、勇士（88-95、06-現在）

威水史：球員生涯—5屆NBA總冠軍（66、68、69、74、76）

教練生涯—3屆NBA最佳教練（83、85、92）

NBA史上10佳教練

94年奧運金牌