05/04/2010

播放本新聞相關短片

雷霆劏牛入季後賽

本文重點

要贏人先要贏自己,西岸嘅雷霆唔係咩勁旅,但今季就憑住一班肯拚搏嘅後生仔贏盡口碑同掌聲。陣中台柱「KD」杜蘭特尋日大發神威,個人攻入全隊最高嘅23分,率領今季表現大躍進嘅雷霆以121:116擊敗西岸勁旅小牛,成功首次躋身季後賽,真係恭喜晒!

47W多上季成倍

作客9連敗嘅雷霆尋日打出代表作,全隊有6位球員得分達雙位數,當中以「KD」最幫到手,貢獻咗23分、5個籃板、5個助攻同職業生涯新高嘅5次偷波,帶挈雷霆作客以121:116贏波,連小牛射手泰利都對杜蘭特讚不絕口:「只要杜蘭特想攞分,根本冇人嘜得住佢。」

兩季前先由西雅圖搬竇到俄克拉何馬州嘅雷霆,今季由韋斯布克、謝夫格連同杜蘭特一班小將撐起隊波,計埋尋日場勝仗已經儲夠47W,足足比上季嘅26W多出接近一倍,榮膺今季NBA「進步王」,教練史葛布魯克斯飲得杯落啦!