邊個話超人係無所不能㗎？NBA球隊魔術首席中鋒「超人」杜域侯活雖然喺球場上來去自如，所向披靡，但要成為MVP，卻至今仍未成功。為咗完成呢個不可能嘅任務，由騎士「大帝」勒邦占士手中搶得MVP寶座，魔術日前專登為杜域侯活成立個人MVP打氣網站，再派埋主帥雲根迪出口術，誓要幫佢谷盡人氣贏出呢場史上MVP最激鬥！

魔術喺上個球季季後賽力克騎士成為東岸冠軍，但結果年度MVP依然落喺占士手中。「超人」今季繼續交出出類拔萃數據，連同尋日朝對小牛嘅17分、20籃板同5封阻，有望成為NBA史上首位連續兩季領先聯盟籃板同封阻次數嘅球員，之但係講到要爭MVP，各界普遍仍然預測，會係「大帝」嘅囊中物。

啟動網站拉票

魔術日前正式啟動Dwight4MVP.com網站，目的就係為侯活爭逐MVP造勢，網頁內詳列「超人」嘅成就同獎項，配以圖像同影片分析佢喺攻守上嘅進步，用到呢着奇招去爭獎，真係唔到你唔服。魔術主帥雲根迪就為侯活抱不平：「呢個其實只係個進攻獎項，啲人投票根本唔考慮球員喺防守上嘅貢獻。如果評選MVP係以球員對球隊嘅貢獻作依據，侯活一定係聯盟No.1，否則，占士打到35歲都仲係MVP。」

事實上，喺今屆MVP熱門候選人中，除侯活外，如安東尼、高比拜仁及杜蘭特等均偏重進攻，不過有傳媒亦駁斥雲根迪說法，直指占士今季喺球隊防守上亦貢獻良多，無論偷波同封阻均極具威力，「超人」要首奪MVP，仍係阻攔重重。

魔術昨晨喺侯活帶領下，作客以97:82大破小牛，輸波嘅小牛今仗只得魯域斯基有正常發揮取得24分，其餘4名正選合共只得20分，聽朝小牛主場迎戰雷霆要讓5.5分，都咪太樂觀，捧下盤好過。