代表國家出戰係光榮使命，偏偏勒邦占士就勁大鼻，尋日同記者呻自己忙到甩轆，除咗話要傾轉會大事之外，仲要拍戲同做波鞋推廣，今個夏天唔使旨意見到佢出席世籃賽喎！為咗錢連國家隊都唔幫，又難怪美國國家籃球主席高蘭基路畀佢激到紮紮跳，「大帝」果然夠巴閉！

尋日騎士喺主場面對公鹿，賽前美國傳媒就搵勒邦占士做訪問，估唔到佢咁語出驚人：「今個夏天我就係自由身，到時要認真考慮吓轉會問題。另外有部電影等住我拍，又要宣傳波鞋，真係好鬼忙。世籃賽？應該唔得閒打！」

美籃主席：唔打冇得玩奧運

美國籃球隊兩年前揚威京奧，身為隊長之一嘅勒邦占士居功之偉。今屆世籃賽喺土耳其舉行，美國隊計劃7月進行集訓，美國隊籃球主席高蘭基路聽到「大帝」話唔打都不知幾嬲：「如果邊位球員冇合理解釋而拒絕出戰世籃賽，咁2012年倫敦奧運就唔使旨意有份玩！」

雖然美國隊大把球星，不過勒邦占士咁好波，如果真係唔玩世籃賽實令好多球迷失望。尋日佢就keep住高水平演出，貢獻23分、9個籃板同7次助攻嘅準三雙成績，率領騎士主場以101:98擊敗公鹿，好波成咁真係抵佢「囂屎」。

拓荒者入季後賽

聽朝騎士會同鷹隊合演東岸大戰，騎士簽番中鋒伊高斯卡斯之後，內線人手充裕番，加上「大帝」同好拍檔莫威廉士近期表現着晒火，對住鷹隊可以秤先，主場讓5.5分「上盤」值得投以信心一票。另邊廂，拓荒者主場118:90擊敗紐約人，篤定攞到季後賽資格，真係恭喜晒！