拿殊真係愈老愈可愛，好似尋日佢又嚟料，病緊都可以喺完場前獨演「神奇2分鐘」，率領太陽作客以111:105燒傷公牛取得8連勝，真係唔到你唔服！

雖然已經36歲，不過拿殊尋日嘅表現可以話不減當年，喺完場前2分鐘更加一個人玩晒，先射入5分帶領太陽反超前，繼而助攻菲爾射入3分波同格蘭希爾入樽，最後再兩罰全中奠定勝局，全場獨取22分同10次助攻。

太陽燒傷公牛8連勝

更令人驚嘆嘅係，原來拿殊尋日受緊背傷同流鼻水折磨：「我背脊真係好痛，仲有啲感冒，成場波都迷迷糊糊。去到完場前，我只係嘗試盡自己所能，好彩我最後真係做到嘢幫球隊贏波。」贏埋呢場，太陽亦繼07年11月後再次取得8連勝，好大機會以西岸前4出席季後賽。

放大圖片

放大圖片

相反，金塊要實現呢個目標就唔樂觀，因為教練卡爾近排接受抗癌治療缺陣後頻頻輸波，聽日主場對近況大勇、力爭更高排名殺入季後賽嘅拓荒者隨時輸波，讓6.5分咪捧！