04年起開始追隨「向師傅」的曾海坤，在擂台上是一台勇往直前的「推土機」，但在館內卻是深得學員、師兄弟姐妹愛戴的「細佬」。「細佬」從小就醉心於各類型的武術，柔道、跆拳道都曾是其最愛，惟自從04年投向泰拳懷抱，便立下決心要在泰拳世界創一番事業。05年首度踏足伊館擂台，舉起第1座獎盃後，便展開了全職泰拳教練生涯至今。

師傅鼓勵捱過低潮

身為副總教練的「細佬」，工作方面發展順利，奈何擂台路上卻荊棘滿途，兩年前「細佬」就因為出戰當屆的「香港泰拳冠軍爭霸戰」前甩骹，迫於無奈退出，不僅之前的努力白費了，更糟的是傷患差點要他放棄理想。「嗰次之後，我好長時間連舉高手都唔得，差唔多半年都發唔到力，操唔到，所有體能、力量、技術全部消失晒！好難受，見到同期嘅對手個個出晒頭，自己就仲做緊物理治療，有一刻真係諗過不如算喇……。」

慶幸在向師傅不斷鼓勵，加上本身努力不懈，「細佬」終於捱過低潮，並與兩位師弟Matthew及「阿聰」同日榮膺「拳王」:「雖然我攞起條腰帶嗰陣，會諗起啲人講『你唔好彩啦！應該早兩年攞』，但係回望冇意思，向前看先啱！」

縱然未知實際會有怎樣的挑戰在眼前，但「細佬」早已目標明確：「我好想去K-1發展，冇錯我年紀係大咗啲（27歲），但係唔試過又點知唔得？機會未到之前，我會更加努力去工作同操弗自己，一嚟就嚟！」