雖然熱火尋日喺東岸第5爭奪戰，作客發揮熱量以87:74燒傷公鹿，但其實兩敗俱傷至真，事關各有謝美奧尼爾同迪芬奴傷出，當中迪芬奴更要由擔架抬出場，難怪賽後隊友都要為佢祈禱。

為免季後賽首圈硬撼「東岸三雄」，公鹿同熱火尋日邊隊贏波，對爭東岸第5極之關鍵，可惜熱火先有中鋒謝美奧尼爾喺無人接觸下整傷右腳膝頭哥傷出，之後公鹿嘅迪芬奴更喺一次上籃後倒地，繼而被體重達到235磅嘅熱火大前鋒夏士林跳起搶籃板後，一腳踩落後腦同頸，結果要用擔架抬出場送入院檢查。

迪芬奴頭頸受傷送院

賽後公鹿教練史卡奧斯話全隊上下都非常擔心迪芬奴：「我哋依家只可以為佢祈禱，希望佢冇事。」講番場波，趁迪芬奴傷出，熱火球星韋迪如入無人之境，最後攞到30分、7個籃板同7次助攻，成為熱火贏波功臣，賽後熱火仍然排第6，暫時落後公鹿只差1場勝仗，聽日主場對速龍讓4.5分，上盤好值博！

最後順帶一提，中國球星易建聯尋日取得職業新高31分，帶領籃網主場以118:110擊敗活塞取得今季第9場勝仗，成功避免成為NBA史上最差成績嘅球隊。