26/03/2010

播放本新聞相關短片

皮雅斯回勇領綠軍闖季後賽

「綠軍」塞爾特人強勢闖季後賽!今季因傷斷斷續續上陣嘅皮雅斯,近排終於上力,尋日更率領塞爾特人主場以113:99大勝金塊,提早進身季後賽,不過皮雅斯就話未夠喉,希望球隊可以愈打愈好,以最佳狀態衝擊總冠軍!

讓帝王12.5分照捧上盤

皮雅斯今季認真黑仔,因膝頭、腳同拇指受傷,前後缺席10場比賽,隨住近期Keep住打狀態回勇,尋日獨取27分,加上加納特攞到20分同10個籃板,及朗度有11分11個籃板同15次助攻取得「大三元」,最終大勝金塊14分,取得近6場第5場勝利。

近5場場均分數高達24.4分嘅皮雅斯,賽後希望未來可以愈打愈好:「我希望球隊嚟緊持續有好表現,以強勢進入季後賽。」其實呢個願望對皮雅斯嚟講唔難實現,事關「綠軍」嚟緊5場比賽都會喺主場打,最後一場更會硬撼騎士,聽日主場率先對弱旅帝王,當然要贏波打好根基,讓12.5分上盤仍然可取!

勒邦芝士