「有毛有翼，識飛啦！」巫師大前鋒巴特治最近成功上位，啱啱仲獲球會提名最佳進步球員，點知成名後竟然扮大牌，尋日公然同教練桑達斯鬧交拒絕上陣，結果累巫師加時後，主場輸畀山貓86:95。
剛提名最佳進步球員
一向只係「二打六」嘅巴特治，早前趁亞連拿斯無限期停賽，加上卡朗畢拿同占美臣等主力被換走，成功上位擔正。
點知巴特治一朝得志就語無倫次，尋日主場對山貓打咗7分半分鐘，就因為唔滿意教練桑達斯叫佢做好啲防守，因而拒絕上陣。
桑達斯賽後接受訪問嗰陣好嬲：「巴特治完全當我發噏風。我同佢講，如果你唔接受教導，你唔會有得出場。我搵助教3次游說佢，點知佢都話唔肯比賽。我教咗波15年，從未見過咁嘅事！」
教練嬲爆喪鬧
隨住巴特治罷賽，巫師其餘球員打得好吃力，最後苦戰至加時，不敵山貓，錄得球隊連續第12場輸波。
賽後桑達斯仲未嬲完，再主動向記者喪鬧巴特治：「佢可以嬲我，但絕對唔可以留低隊友，喺球場入面孤軍作戰。」桑達斯更暗示巴特治將被罰內部停賽，可憐巫師啱啱仲寫信畀NBA，提名巴特治選最佳進步球員，睇嚟提名佢選「最反骨球員」機會大啲喎！