擁有籃網股份

Jay-Z喺Rap壇嘅最大對手P Diddy，早前被踢爆想收購陷財困嘅水晶宮，不過講到投資經驗同能力，似乎Jay-Z更加有保證！據報Jay-Z嘅總身家高達5億英鎊，老婆Beyonce亦係樂壇天后，兩公婆搵銀能力極強，加上Jay-Z早已涉足體育投資，包括擁有NBA球隊新澤西籃網嘅股份，絕對唔係門外漢。

用傷「兵」做新歌題材

其實Jay-Z做「兵工廠」球迷不過5年時間，而且係由亨利開始：「因為亨利嘅關係，我5年前開始支持阿仙奴，但依家已經深深愛上呢間球會。」傳聞Jay-Z嘅新碟入面，仲會有首歌係以戴亞比、艾朗藍斯同伊度亞度達施華嘅恐怖受傷做題材。Jay-Z真係成功注資嘅話，第日做埋阿仙奴代言人都得啦！

Liam＠Oasis想贊助曼城

樂壇唔少明星都係足球Fans，Oasis樂隊嘅Liam Gallagher已公認係曼城天字第1號擁躉，據報佢最近就密謀搭路用自己創立嘅服裝品牌Pretty Green嚟贊助曼城，佢亦公開承認：「我願望係見到Pretty Green以贊助商身份出現喺曼城件波衫度！」

Jay-Z小檔案

原名：Shawn Corey Carter

年齡：40歲

簡介：曾經10度贏得格林美音樂獎項，96年出道後發行過11張冠軍專輯，數量超越貓王，僅次披頭四排史上第2位，佢同時亦係娛樂公司老闆，08年迎娶R&B天后Beyonce成為樂壇佳話。