20/03/2010

播放本新聞相關短片

安東尼贏波預祝做老襯

本文重點

近排NBA邊個至幸福?梗係安東尼啦!皆因佢事業愛情兩得意!尋日先取得職業新高18個籃板,帶領金塊贏波,有傳佢仲豪花200萬美金買咗一棟豪宅,準備嚟緊暑假娶老婆!

18個籃板創新高

由於簡安馬田繼續缺陣,基斯安達臣啱啱好番,連尼又要同黃蜂中鋒奧卡科喺內線角力,結果造就安東尼尋日化身「籃板王」,取得職業新高18個籃板,兼有26分進帳,帶領金塊主場贏黃蜂93:80。不過安東尼賽後就話唔係好滿意:「我今晚應該可以攞到20個籃板,因為我知道連尼要全力mark奧卡科,其他球員又要對付大衞韋斯,實在係一個好機會畀我搶籃板。」

其實又真係抵安東尼咁風騷嘅,事關呢位將會喺嚟緊暑假同未婚妻、美國著名電視藝人La La舉行婚禮嘅球星,啱啱被踢爆斥資200萬美金(約1,556萬港元)喺洛杉磯買咗一棟西班牙式、佔地6,500平方呎嘅豪宅做,真係恭喜晒!