19/03/2010

播放本新聞相關短片

山貓贏波賀佐敦21億做班主

本文重點

「波神」米高佐敦榮升班主!呢位47歲傳奇球星早前提出收購山貓,尋日卒之獲NBA董事會投票通過,成功以2.75億美元(約21億港元)完成收購,成為NBA史上首位退役球員班主,真係恭喜晒!

米高佐敦係以個人投資者身份成為大股東,「波神」已經答應孭起山貓1.5億美元(約11億港元)嘅債務,呢位聯盟史上第2位黑人班主話:「收購山貓係我職業生涯之後嘅最大成就,我希望能夠喺北卡羅萊納州建立一支具影響力嘅球隊,未來日子我會全力協助山貓取得成功。」

孭起11億債務

有「波神」做班主,成班球員都醒神晒!尋日史堤芬積遜攻入全隊最高嘅20分,加上另外4位隊友亦貢獻雙位數得分,最終山貓喺主場以100:92擊敗雷霆,冇令到場打氣嘅新班主米高佐敦失望。山貓近排個勢咁好,明星前鋒謝勒華萊士又傷愈,聽朝造訪鷹隊受讓5.5分,下盤玩得過!

真‧怒比利