騎士衞冕常規賽東岸冠軍又行近一大步！佢哋尋日憑勒邦占士「MVP級」表現，主場以104:93大勝爭標勁敵之一塞爾特人。可憐「綠軍」又喺一場重要戰役輸波，賽後更被倒戈嘅鮑維狂插退步。

其實兩隊上個月尾先交過手，當時騎士作客大勝塞爾特人20分。尋日騎士返番主場發揮當然更得心應手，當中勒邦占士喺下半場更大發神威，射入全場30分中嘅24分，兼有8個籃板、7次助攻、2次偷波同3次封波，不過喺第3節一次上籃時畀加納特插眼。賽後占士話好頭痛，仲話可以打晒成場賽事好好彩，因為受傷後有15分鐘覺得視覺好模糊，去到完場前先睇得清楚番啲嘢。

鮑維倒戈插綠軍老化

尋日場波另一個焦點係鮑維，因為佢係08年塞爾特人總冠軍功臣之一，尋日佢為騎士上陣8分鐘有6分，賽後鮑維指球員太老係「綠軍」最大弱點：「睇番塞爾特人當年攞冠軍時嘅防守，同依家真係差好遠，成隊波打得好慢，可能佢哋真係老啦！」

放大圖片	放大圖片	放大圖片

賽後騎士已經拋離塞爾特人10場勝仗，不過領先第2位嘅魔術只有5.5場，為確保東岸冠軍，聽日作客活塞當然不容有失啦，少讓4.5分上盤絕對值得支持！