近況大勇嘅魔術，尋日主場對公牛，藉住對方球星戴歷羅斯受傷，主場大勝111:82，締造今季球隊最長7連勝紀錄，弗到咁，聽日作客巫師，上盤當然穩陣啦！

畀杜域侯活整傷手腕

魔術今季係戴歷羅斯嘅剋星，因為繼上次交手整傷背脊同手腕後，尋日交手又喺一次上籃時畀杜域侯活撞跌，整傷左手手腕，打咗12分鐘就傷出。本來公牛未打前已經有諾亞同鄧格缺陣，喺戴歷羅斯傷出後，更加唔夠人使。最終魔術卡特射入23分，帶領球隊大炒公牛，創造7連勝紀錄。

賽後杜域侯活解釋自己冇意整傷戴歷羅斯，仲透露之前喺明星賽已經教過羅斯仔騰空時要擘開雙腳平衡，希望佢保重身體咁話，可憐羅斯照X光後呈陰性反應，嚟緊要去邁阿密做多次磁力共振，先知傷勢有幾嚴重要抖幾耐。

講番魔術，隨住尋日擊敗公牛，佢哋落後榜首騎士得番4場半距離，唔係話冇得追，聽日作客5連敗嘅巫師肯定全力爭勝，讓10.5分上盤仍然捧得過！