騎士破宿命迎冠軍先兆！一向靠勒邦占士孭飛嘅騎士，尋日終於3年嚟首次喺「大帝」缺陣下贏波，主場以97:95擊敗馬刺，成為今季首支突破50勝球隊，難得對上兩季做出呢項成績嘅球隊都成為總冠軍，對騎士嚟講絕對係一個吉兆。

馬刺防守散晒讓唔起

由於右腳腳踝有傷，勒邦占士尋日繼續缺陣，加上奧尼爾長抖，占美臣又喺第3節傷出，如果騎士輸波，真係有大把藉口。不過騎士其餘球員尋日大打爭氣波，當中莫威廉士射入17分，韋斯又喺第4節大發神威，射入全場16分中嘅10分，兼喺完場前1分鐘作出一次關鍵嘅偷波，最後終止咗騎士自07年後，9次冇勒邦占士壓陣都輸波嘅宿命。

騎士贏波後，歷來首次成為季內第1支突破50勝球隊。翻查資料，對上兩季首支突破50勝嘅塞爾特人同湖人，最後都順利攞到總冠軍，呢個數據可以話對騎士爭標打下一支強心針。

放大圖片	放大圖片	放大圖片

其實馬刺尋日輸波，除咗因為冇柏加外，防守鬆懈先係最致命，多次激到教練普波維治塊面好似關公咁紅，聽日返番主場對住回勇嘅紐約人，讓8.5分絕對有暗湧，寧博下盤！