08/03/2010

播放本新聞相關短片

馬刺慘勝灰熊柏加斷掌骨

雖然尋日作客以102:92輕取灰熊,但馬刺卻遭逢沉重打擊,就係首席控衞柏加因為手掌其中一節掌骨骨折,預計至少要抖6周,對於正喺西岸爭逐季後賽更高排名嘅馬刺嚟講,帶來重大考驗。

至少抖6星期

馬刺尋日有6位球員攞到雙位數得分,贏波兼令灰熊連續8場主場不勝,不過柏加喺首節末段一次搶截,就連佢本人都唔清楚係「篤魚蛋」定係畀對手撞親,只知搶完波後手部即刻劇痛,經檢驗後證實手腕對上一節骨出現骨折,預計起碼要抖6周。

連埋尋日場波,馬刺已經4連勝,佢哋目前排喺西岸第7,只差「老二」小牛5場勝仗,可惜依家柏加長抖,想收窄差距似乎唔易。至於佢哋聽朝嘅對手騎士,尋日因為占士足踝受傷缺陣,作客以85:92不敵公鹿,6連勝走勢終止。不過占士傷勢唔算嚴重,聽朝或者可以復出,要喺主場大炒有柏加倦勤嘅馬刺機會樂觀,騎士讓6.5分捧上盤。

史杜基檢驗無礙出院

講番日前突然離奇暈低嘅活塞球員史杜基,初步檢驗話佢一切正常,周末已經出咗院,不過返到底特律後會接受進一步治療。

白蘭芝