「閃電俠」韋迪同「小飛俠」高比拜仁邊個勁啲？要拗真係有排拗，但如果淨計尋日嘅表現，韋迪肯定先贏一鋪，事關佢帶領熱火主場經加時後，以114:111擊敗由高比揸旗嘅湖人連贏2場。

韋迪14助攻勝高比

熱火同湖人每次對壘例牌緊張，對上4次交手每次分差都喺3分以下。尋日兩隊對賽，雙方全場有19次打成平手，31次互換領先，創出今季NBA新高，不過講到尾，韋迪對高比拜仁呢個match up，先係精華所在。雖然韋迪只得27分，比高比嘅39分要低，不過「閃電俠」就交出今季新高嘅14次助攻，加上謝美奧尼爾喺加時完場前成功博到高比進攻犯規，成為熱火贏波嘅關鍵。

其實熱火尋日無論贏定輸，都會繼續排東岸第8，不過尋日擊敗湖人，就取得1月中後首次2連勝，難怪熱火嘅昆田李察遜都話意義重大。聽日熱火將會繼續喺主場對鷹隊，為咗爭取更高排名，確保進身季後賽，小讓2.5分上盤絕對值捧！