艾佛遜NBA生涯爛尾！曾被譽為NBA史上最佳後衞之一嘅「AI」艾佛遜，尋日突然被76人炒魷，據講導火線係艾佛遜竟被揭發早前以湊女為名，實情喺放假期間同朋友舉行狂歡派對，問題一個接一個令76人徹底死心。一代「戰神」淪落至此，實在令人心酸。

做狂歡Party宣傳賣點

艾佛遜早前稱聲要照顧患上不知名病症嘅4歲女兒，宣布同球會達成無限期離隊協議。尋日76人正式宣布，艾佛遜今季將唔會重返球隊，由於「AI」之前只係同76人簽約至今季尾，所以今次同被炒冇分別。

美國傳媒近日爆料，話艾佛遜日前竟然偷偷同一位歌手朋友，喺夏洛特舉辦狂歡派對，而且仲出埋海報，上面印有艾佛遜嘅相，擺明用佢出席作為呢個派對嘅賣點，而且仲清楚列明日期喺2月27號，正正係「AI」向76人請假湊女期間，水洗都唔清。

今年34歲嘅艾佛遜，曾奪常規賽MVP兼4奪得分王，今季初轉投灰熊因為唔滿意打後備曾一度退休，但最後復出重返76人，希望證明身價，可惜冇珍惜機會落得如斯田地，實在令人不勝唏噓！