76人今季認真麻煩多多，繼艾佛遜無限期離隊，尋日以105:126大敗畀魔術後更加爆發內亂，球迷喺場內高聲要求教練辭職，教練反插「小AI」伊古達拿唔掂，聽日作客鷹隊，睇怕都係凶多吉少！

艾迪佐敦賴小AI唔掂

近況低迷嘅76人，尋日作客魔術仍然冇咩起色，打完第3節後，更已經被對手射入102分，結果令好多入場捧76人嘅球迷冇眼睇提早走人，剩番嘅粉絲就高叫教練艾迪佐敦下台。其實76人今季成績咁差，艾迪佐敦真係責無旁貸，不過佢喺賽後反而將責任推畀「小AI」伊古達拿：「一個球員打得曳會蔓延全隊。必定要有一位球員企出嚟，帶領隊友進行反擊！」

雖然伊古達拿事後拒絕正面回應艾迪佐敦嘅批評，但講嘅嘢就句句有骨：「玩推卸責任，最後只會跌入死胡同。我喺場上只係繼續做我職業生涯一直做嘅事，就係以正確方式打波。」鬧到咁僵，睇嚟76人仲有排衰，聽日作客東岸「三哥」鷹隊受讓8.5分，都係捧上盤為妙！

放大圖片	放大圖片	放大圖片