憑藉「大帝」勒邦占士豪取36分，騎士尋日喺東岸冠軍前哨戰，作客以108:88大勝「綠軍」塞爾特人，爭標又行近一大步。

破對賽宿命衞冕形勢佳

其實塞爾特人尋日一開始打得唔錯，騎士完全Mark唔住佢哋嘅朗度，第一節落後10分，不過喺第二節有「巨無霸」奧尼爾傷出嘅騎士，之後憑勒邦占士出色嘅表現，加上好拍檔莫威廉士喺第4節射入全場19分中嘅14分，配合埋出色嘅防守，令「綠軍」喺第4節21次起手只得3球中，最終以20分之差反勝。

呢場勝仗，亦令騎士終止連續9場作客輸畀塞爾特人嘅紀錄，同時喺東岸拋離第二位嘅魔術5場半勝仗，同第3位嘅塞爾特人同鷹隊，更相差7場半，衞冕東岸冠軍形勢大好。相反塞爾特人喺皮雅斯受傷後，對上3場已經輸咗2場，狀態不穩，聽日主場對住東岸包尾大幡籃網讓13分，隨時爆下盤都唔奇！ 文：雞髀拜仁