「蝙蝠殺手」真路比利再顯神威，尋日朝馬刺主場迎戰雷霆末段，成功封阻目前NBA得分王杜蘭特嘅單刀入樽，帶領馬刺以95:87報捷之餘，仲將杜蘭特連續取得25分以上場數定格喺29場，粉碎佢挑戰米高佐敦紀錄嘅美夢。

連續攞25分以上場數斷纜

目前以平均得29.9分位列聯盟得分榜首嘅「KD」杜蘭特，自從舊年12月19日起，至今連續29場攞到25分或以上，成為自米高佐敦喺86/87球季造出嘅NBA最佳紀錄40場後，最出色一人。可惜「KD」遇着喺舊年萬聖節可以徒手捉蝙蝠嘅真路比利，結果身高達6呎9吋嘅「KD」喺完場前3分鐘嘅一次單刀入樽，慘被矮佢3吋嘅真路比利封低，道氣被打窒，今仗最終亦只能錄得21分同12個籃板。

雖然追趕「波神」美夢暫未能實現，但杜蘭特仍對真路比利讚不絕口：「清脆利落！佢做出一次偉大嘅封阻。」真路比利笑言佢只係盡力一試，佢甚至認為自己會畀杜蘭特喺面前入樽。咪以為真路比利只係得呢球封阻夠威，查實今仗佢仲交出26分，包括完場前一記關鍵3分，為馬刺鎖定勝局。

馬刺今仗續有鄧肯交出水準入19分及攞到15個籃板，同時間仲有控衞柏加復出，人腳恢復完整加上氣勢勇銳，聽朝佢哋僅讓3連敗嘅火箭3分，上盤抵玩。