銀牌賽今晚喺修頓室內場正式開打，揭幕戰7:00由超敏迎戰飛鷹，尾場8:30由衞冕嘅南華對愉園，門票30元，長者及學生20元。賽事焦點將落喺三位新加盟南華嘅球員身上，當中「占士」陳翊麟將重遇母會愉園，他揚言一定會畀足心機，以報答母會過去對自己嘅栽培！
用表現答謝栽培
身高1米90嘅陳翊麟，係甲一籃壇少數能夠輕鬆入樽嘅球員，呢位22歲嘅港隊前鋒就話：「愉園係我第一間甲一球會，之後再轉到旭暉再轉到南華呢間大球會。我好想喺呢場波爭取表現，除咗可以爭正選之外，仲可以畀母會知道自己已經成長咗好多，佢哋3年以嚟對我嘅栽培係無白費。」
