南華今屆雖有周健宏、陳翊麟和李翹峰3個新球員加盟，但球隊名單就有4個新名字。第4個新名字叫做陳浩明，不過「陳浩明」其實只是原有球員陳張敏嘅化名，佢上年加入娛樂圈，仲改咗個藝名，話自己新球季即使要賽事訓練同埋樂隊宣傳兩邊忙，但一定會全力以赴去做到雙贏：「3月同4月對我嚟講係好重要，首先銀牌決賽就會喺三月尾舉行，我當然想幫球隊衞冕。另外，自己嘅樂隊『4anda』首張大碟亦喺4月初復活節正式推出，到時一定會忙於宣傳，希望可以兩者都做得好啦！」