本文重點
「百歲大壽」素來飲宴都會大排筵席，適逢今年南華體育會成立一百周年，南華籃球隊都話要賀一賀佢！佢哋一班球星譚偉洋、羅意庭、劉子健等，已經計劃要送一份比千足金更有分量嘅「雙料金牌」做賀禮，佢哋先要蟬聯今日開鑼嘅銀牌賽；再喺甲一聯賽重奪失落一屆嘅錦標，誓為南華「百年壽宴」添兩金慶生！
高級組銀牌賽今晚喺修頓掀開戰幔，力爭衞冕嘅南華先要同愉園爭逐四強席位，呢支以「三連霸」為目標嘅勁旅今屆有三位新球員加盟，佢哋包括周健宏、陳翊麟同埋李翹峰，令球隊實力直線上升。
去寶島跟操實力大增
班主洪游奕話加入新血，無非係想贏個冠軍嚟賀南華體育會一百周年：「我哋今年加咗三個年輕球員，希望隊波可以更有活力，速度又可以再快啲！19歲就已經打港隊嘅周健宏更加係球隊重點栽培球員。另外，大家可能唔知，其實李翹峰都係南華出身，7年前球隊升班甲一時佢都有份幫手，所以今年同佢商量咗好耐，希望可以喺南華一百周年搵佢返嚟打波。」李翹峰上屆幫永倫喺聯賽擊敗南華奪標，今次重歸南華相信可以為球賽帶來新
衝擊。
睇番南華個新陣容，今年除咗有三位猛將加盟，再配合原有嘅譚偉洋、羅意庭、劉子健、胡國鋒、李劍煌等一眾奪標功臣，要火併上季甲一季後賽盟主永倫，肯定睇頭十足！隊長譚偉洋更認為球隊今年更有優勢：「球隊喺季前就送咗羅意庭、周健宏等年輕球員去台灣跟操，實力『升呢』之餘更成長咗好多；再加上我哋喺二月初舉行嘅工商盃決賽曾經擊敗過佢哋，信心方面亦提升咗唔少。」