攞景定贈興？尋日紐約人主場對公鹿，本來慶祝球會奪標40年，點知公鹿好唔識做大勝83:67，仲整傷埋對方啱啱加盟嘅「T-Mac」麥基迪，真係咩彩都攞晒。

T-Mac受傷對綠軍或倦勤

其實紐約人尋日上半場打得唔曳，至多都係落後公鹿6分，但當喺半場慶祝球會喺70年奪得NBA總冠軍40周年後，成班波突然走晒樣，最後成隊只得67分，創出球會自07年11月輸59:104後最低得分紀錄。公鹿今場以中鋒波格特表現最好，獨得24分同20個籃板，僅僅比紐約人下半場總得分少2分。

啱啱加盟紐約人嘅麥基迪，尋日繼續擔正，上陣30分鐘取得15分4個籃板1次助攻，不過賽後「T-Mac」話喺比賽入面，多次聽到膝頭哥出現砰砰聲，嚟緊對塞爾特人可能缺陣。公鹿贏埋呢場後，已升上東岸第8位，聽日主場對住繼續缺少基斯保羅嘅黃蜂，受讓1.5分梗係捧下盤！

放大圖片	放大圖片	放大圖片