杜蘭特成「後波神時代」最強得分武器！呢位雷霆球星尋日作客木狼又豪取32分，創造連續28場得分「25+」紀錄，超越艾佛遜成為當今球員「冧巴溫」。

只係第3年打NBA，但杜蘭特已經做到一項現役NBA所有球員做唔到嘅紀錄。隨住尋日作客木狼射入32分，杜蘭特已經將連續每場射入25分或以上紀錄增加至28場，超越艾佛遜喺01年所創、連續27場射入25分以上嘅紀錄。強如勒邦占士，喺08年都只係試過連續21場得分「25+」。不過杜蘭特距離佐敦86-87年所創嘅連續40場「25+」，就仲差12場。

雷霆9連勝

成為當今NBA「冧巴溫」，本來應該好開心，不過杜蘭特就話對雷霆作客以109:107擊敗木狼，延續球會史上最長嘅9連勝紀錄仲興奮：「我更滿足球隊連贏9場，因為係我籃球生涯第一次。」

放大圖片

放大圖片

要喺NBA創造紀錄唔易，雷霆教練史葛布魯克斯就讚揚杜蘭特（KD）有咁嘅成就全靠夠勤力：「『KD』默默耕耘，你可以從佢賽前做嘅準備工夫睇到，每日『KD』都準備充足，我一啲都唔驚訝佢可以打破紀錄，因為佢每日都不停努力練習、翻睇錄影帶，不停鞭策自己。」杜蘭特為延長個人同球會紀錄，嚟緊肯定唔會手軟，聽日主場對太陽受讓2.5分，下盤抵玩到暈！