本文重點
被譽為今季NBA四大奪標熱門—騎士、塞爾特人、湖人同金塊，尋日進行大混戰，結果金塊同塞爾特人各自險勝對手，其中騎士雖然有勒邦占士創出NBA新紀錄，但經加時後主場仍以116:118不敵金塊，認真掃興。
安東尼KO弗爆占士
由於啱啱先進行交易，騎士有多位新球員尋日都趕唔切上陣，包括占美臣，不過勒邦占士仍以一人之力撐起球隊，獨取43分、13個籃板、15次助攻、2次偷波同4次封波，成為NBA史上首位攞到呢項恐怖數據嘅球員，可惜最後仍敵唔過同樣屬於「03黃金一代」、射入40分嘅安東尼，佢喺加時完場前1.9秒喺占士面前跳投射入，奠定勝局。
同日「綠軍」塞爾特人藉湖人球星高比拜仁缺陣，加上5名正選得分都達雙位數，作客以87:86險勝對手。最後推介埋聽日嘅賽事，小牛喺換入卡朗畢拿後實力大增，主場面對有「閃電俠」韋迪上陣成疑嘅熱火，即使讓8分上盤都要捧！
