本文重點
NBA送舊迎新！隨住轉會市場即將關閉，NBA多支球隊都密謀進行交易望虎年行大運！其中騎士尋日率先同巫師及快艇達成三方交易，換入巫師球星占美臣，全力協助勒邦占士爭標。
傳帝王斟T-Mac先簽後放
為咗增加籌碼爭奪今季總冠軍，騎士尋日同快艇及巫師進行交易，騎士將中鋒伊高斯卡斯送去巫師，換嚟巫師球星占美臣，又由快艇得到後衞泰化亞，至於巫師就獲得快艇嘅科尼頓，快艇就得到日前先由小牛加盟巫師嘅大前鋒古頓。呢單嘅交易嘅最大得益者肯定係騎士，皆因貴為05同08年明星賽球員嘅占美臣，今季平均每場有20.5分，相信加盟後可減輕占士嘅負擔，聽日騎士作客山貓讓3分，上盤值得睇高半線。
外面仲傳帝王同火箭已經初步達成協議，帝王將用奇雲馬田、堅尼湯馬士、洛迪古斯、曉頓岩士唐交換火箭嘅「T-Mac」麥基迪、今季第六人大熱蘭特利、杜斯及一筆現金，之後帝王會再將麥基迪送去紐約人。