「閃電俠」重溫美夢！4年前喺達拉斯首奪總冠軍同MVP嘅「閃電俠」韋迪，尋日重臨舊地再次搵番呢種感覺，憑藉全能嘅表現技壓「達拉斯雙雄」，喺破世界籃球紀錄嘅10萬名球迷見證下首奪明星賽MVP，成為東岸明星隊以141:139擊敗西岸明星隊嘅最大功臣。

由於高比拜仁、基斯保羅等多名球星臨時退隊，賽前外間估計會削弱今屆明星賽嘅入場人數，誰不知竟然錄得108,713名球迷入場，打破肯塔基對密茲根呢場大學籃球賽喺03年所創嘅78,129人入場嘅全球籃球入座紀錄。當中本身喺達拉斯出世嘅速龍「龍王」保殊同効力小牛嘅魯域斯基，尋日喺鄉親父老面前特別sharp醒，分別攻入23同22分，只係始終唔及熱火球星韋迪。

占士後手入樽，個樣High爆。 （美聯社圖片）	（左起）穆連、柏賓、伊榮同「魔術手」莊遜齊齊亮相明星賽。 （美聯社圖片）	新紮三分王皮雅斯帶埋囡囡睇波，感受熱鬧氣氛。（美聯社圖片）

重臨06年封王福地

韋迪尋日唔止有28分，仲交出11次助攻、6個籃板同5次偷波，成為繼61年嘅奧斯卡羅賓遜（23分14次助攻）同84年嘅活塞名將湯馬士（21分15次助攻）後，NBA60年明星賽歷史上，第3位有20分同11次助攻或以上嘅球員。

對於首奪明星賽MVP，韋迪好興奮：「我知道我有能力喺咁多球迷見證下有好表現，我知道我一定可以攞到MVP，因為我曾經做到！」韋迪所指嘅，其實就係06年總決賽帶領熱火擊敗小牛兼攞MVP：「我喺達拉斯有少少運，06年對於我係一次難忘嘅經驗，可以再嚟呢度兼再攞MVP，感覺真係好特別。」

美式足球場打明星賽

今屆NBA明星賽之所以打破世界籃球入場紀錄兼牛仔球場入場最高紀錄，可謂全靠小牛班主古班！多得佢策劃成件事，拉攏美式足球牛仔隊嘅班主鍾斯，喺佢都有份合資、總值12億美元嘅美式足球場舉行明星賽。鍾斯對於古班有讚冇彈：「古班簡直就係一部引擎，係佢令呢件事夢想成真！古班成日同我講，如果佢吸引唔到咁多球迷入場睇，佢唔會想做，估唔到佢真係做得到！」