萬眾期待嘅NBA明星周末，嚟緊將會一連三日假達拉斯舉行！聽日打頭陣嘅會係新秀對抗賽。二年生一向係呢個賽事嘅大熱，不過今屆臨時有「牛魔王」戴歷羅斯退隊，面對泰拉基伊雲斯同真寧斯兩位勁爆新人「挑戰」，7連勝走勢恐怕要告一段落！

由2000年開始，NBA新秀賽由東西岸對壘改為新秀隊對二年生隊，結果二年生喺10屆比賽，獲得8勝2負，對上7屆更獲得全勝。新秀賽教練係由明星賽教練所屬球隊助教出任，今年二年生隊教練就係魔術助教、前紐約人名將「大猩猩」伊榮，至於助教就由速龍「龍王」保殊出任，球員、教練個個分量十足。

泰拉基伊雲斯真寧斯弗爆

可惜被譽為二年生隊嘅星中之星、効力公牛嘅「牛魔王」戴歷羅斯，因為今屆勁到破天荒先後入選二年生隊、東岸明星隊同技巧賽，公牛驚佢打到殘，最終成功向NBA申請，獲免役唔使參加二年生賽，但對二年生隊嚟講，確係削弱咗實力。人算不如天算，戴歷羅斯更喺尋日朝早對魔術場波撞傷肋骨，打唔打到明星賽仲係未知數。

新秀隊一向被人認為欠缺經驗，不過有實力絕對可以彌補到，今屆新秀隊就罕有地有兩位超新星崛起，包括帝王嘅「新麥基迪」泰拉基伊雲斯，以及之前喺常規賽曾獨取55分嘅公鹿控衞真寧斯，兩人都被譽為今季NBA「新人王」，難得今日同場獻技，畀人攞嚟比較，肯定加多兩錢肉緊「拉票」，再加上幕後有前六屆明星賽球員、現任金塊助教丹特利，以及上屆新秀賽MVP杜蘭特「教路」，新秀隊絕對有力繼02年後，令一班「師兄」俯首稱臣！