啱啱入選明星賽三分大賽嘅比立斯，尋日喺金塊作客湖人嘅西岸冠軍前哨戰中，轟入個人職業新高嘅9個3分波，帶領金塊作客以126:113撞散湖人，技術性擊倒高比拜仁。

金塊近年進步神速，上年殺入西岸決賽僅負湖人，今季又同湖人叮噹馬頭。尋日兩隊交手，雖然金塊續缺得分王安東尼，好彩比立斯大發神威，全場取得39分，包括射入9個3分波都刷新自己嘅生涯紀錄，當中喺第3節獨取21分，是繼76人球星張伯倫喺1966年2月取得23分後，成為對湖人單節得分最高球員，鋒芒完全蓋過有33分嘅高比拜仁。

比立斯啲三分波出晒名準，所以尋日NBA公布明星賽三分大賽名單，佢同塞爾特人嘅皮雅斯都入選，其餘參賽者包括衞冕嘅熱火射手曲克、勇士嘅史堤芬居里，太陽嘅菲爾同紐約人加連拿利。