「大帝」盡顯全能王本色！一向瓣瓣有嘅勒邦占士，尋日因為吉遜遲到臨時客串控衞，點知一樣難唔到佢，仲搞到老死韋迪無啖好食，帶領騎士主場以102:86大勝熱火，連贏10場。

K.O.韋迪頭上入樽

原本已經有莫威廉士同韋斯兩名控衞倦勤嘅騎士，尋日再有吉遜因為懷孕嘅未婚妻臨時作動，要送佢入院而遲到，結果搞到勒邦占士一開始要客串控衞，但「大帝」全場仍然有36分、7個籃板同8次助攻，仲試過喺韋迪頭上入樽，兼令對方全場只得24分。賽後占士話新角色難唔到佢：「我可以由自己半場帶到對方半場，我夠膽講，我攞住波時做嘅嘢，依家喺NBA入面好多控衞都做唔到。」

聽日騎士主場會對紐約人，以占士嘅勇態，出名攻強守弱嘅紐約人點箝制到佢？騎士讓10分可捧上盤！另外，快艇教練米克鄧利維尋日突然辭職，委任甘曉士做臨時教練，依家全隊立立亂，主場對馬刺受讓3.5分，都係捧番上盤為妙。