日前日本喺熱身賽同委內瑞拉踢成0:0，證明冇咗外流球星中村俊輔、長谷部誠同本田圭佑，實力始終差啲，不過岡田武史信心爆棚，佢話今次會玩車輪戰試陣，所以只會對南韓出最佳陣容。

岡田武史聲言玩車輪戰

岡田把口睇唔起國足，實情積極備戰，據聞佢喪睇對委內瑞拉嘅錄像，諗計提升火力，玉田圭司、佐藤壽人、大久保嘉人、田中鬪莉王更自發加操，今仗日本用小笠原滿男拍遠藤保仁擔任雙核，前線平山相太同玉田圭司攻堅，連續3屆做二奶嘅日本，似乎好想贏番次。

中國殘陣孫祥踢番左閘

國足05年贏過東亞錦標賽冠軍，可惜今次陣容殘到喊，射手韓鵬、中場鄭智、邵佳一、周海濱、毛劍卿、蒿俊閔因為唔同理由缺陣，左閘榮昊亦傳有傷可能避戰，意味近期轉踢中場嘅孫祥，要做番老本行踢左閘。

正因為咁，中國足協新主席韋迪都話，今次東亞錦標賽要求係踢出「底氣」，唔好輸得太肉酸，大營氣氛亦好輕鬆吓，未有頒令「沒收」球員電腦、手機備戰。即使係咁，有1米86中鋒郜林喺前線孭飛，又有剛啱轉會至韓職總冠軍全北汽車嘅馮蕭霆鎮守後防嘅國足，12年未贏過日本嘅羞家紀錄，恐怕要延續。