01年NBA總決賽，76人「AI」艾佛遜大戰湖人「小飛俠」高比拜仁嘅經典場面，尋日喺76人主場重現，結果「小飛俠」再次力壓「AI」，為聽日作客塞爾特人進行嘅08年總決賽翻版戰打下強心針，湖人受讓4.5分下盤咪錯過！

湖人撼綠軍08總決賽翻版

艾佛遜喺01年帶領76人殺入總決賽，雖然最後以1:4大敗畀湖人，但同高比拜仁嘅match up，至今仍令人難忘。估唔到呢個經典場面尋日喺NBA重現。雖然高比全場畀20,000名主場球迷狂噓，但仍然射入24分，唔止比艾佛遜攞多1分，仲帶領湖人作客以99:91擊敗76人。對於再喺76人主場迎戰老對手，高比感慨良多：「呢場波勾起我唔少回憶，今晚真係好刺激。」

正所謂好戲在後頭，話咁快聽日湖人又作客塞爾特人重演08年總決賽翻版戰。湖人近7場作客贏5場，相反「綠軍」塞爾特人近況飄忽，對上7場輸5場，尋日更以91:100不敵鷹隊，被對方搶去東岸「二哥」位置之餘，仲喺11年嚟首次一季連輸4場畀鷹隊，狀態咁曳，湖人有力報番當年一敗之仇。