NBA明星賽昨公布新秀挑戰賽名單，幾位有份入選二年生隊嘅球星好似公牛控衞戴歷羅斯、灰熊中鋒馬克加素以及網隊中鋒布克盧比斯等都不約而同喺尋日比賽發威，一於盡騷Quali為二年生隊打響聲勢！

布克盧比斯率網隊反彈

新秀挑戰賽係由今年加入NBA嘅新人組成一年生隊，對決由上年新秀領軍嘅二年生隊，雙方參賽名單就由各支NBA球隊嘅助教選出。事實上，今季一年生隊陣容甚有睇頭（見附表），當中包括曾經單場獨取55分嘅公鹿新秀真寧斯，以及帝王後衞泰拉基伊雲斯等人！

唔知係咪感受到威脅，幾位入選二年生隊嘅NBA球星尋日都交足功課示威，好似戴歷羅斯射入26分兼取得7次助攻幫公牛擊敗雷霆；灰熊亦喺馬克加素取得25分及12個籃板之下擊敗活塞；至於布克盧比斯亦攻入19分同搶到9個籃板，助網隊以103:87力挫快艇兼終止11連敗走勢，聽朝主場對有亞連拿斯被判今季餘下時間停賽嘅巫師，讓1.5分可玩上盤！