25/01/2010

播放本新聞相關短片

得分王大戰占士守贏杜蘭特

今季NBA兩大得分王勒邦占士同杜蘭特,尋日正面交鋒,結果「大帝」唔單止喺得分方面擊敗對手,仲喺最後一刻成功守贏「KD」杜蘭特,帶領騎士主場以100:99險勝雷霆。

騎士殘陣讓唔起熱火

喺未打呢場大戰前,勒邦占士同杜蘭特分列NBA得分王第二同第三位,所以尋日各界都極之留意呢場對決。結果「大帝」技勝一籌,取得37分、9個籃板同12次助攻,完場前8秒先喺騎士落後95:96嘅時候,妙傳後衞吉遜射入3分波反超前,再喺完場前0.9秒,成功封走杜蘭特嘅上籃,成為騎士最後以1分勝出嘅最大功臣。

對於成功封走杜蘭特嘅射波,占士表示關鍵在於Timing:「當杜蘭特跳起嘅時候,我亦啱啱跳起,好好彩佢反應比我慢。」雖然連續兩場目睹球隊喺最後一秒輸波,不過尋日射入34分嘅杜蘭特就表示唔會因為咁而氣餒,揚言會繼續努力。

最後講番騎士,雖然尋日佢哋贏波,可惜聽日作客對住尋日主場以115:84大勝帝王嘅熱火,繼續有莫威廉士同韋斯受傷缺陣,即係話要續以第四後衞吉遜擔正,都咪話唔牙煙,熱火受讓2分絕對有望開出下盤。

勒邦芝士