23/01/2010

播放本新聞相關短片

大帝發威騎士挫湖人

繼聖誕夜作客大破湖人之後,騎士昨晨喺主場再遇呢支NBA衞冕總冠軍,喺「大帝」勒邦占士嘅精彩演出帶領下,再以93:87力克對手。翻查「大帝」近9次同湖人「小飛俠」高比拜仁嘅王者激鬥,占士竟然有7次贏波之多,「大帝」氣勢逼人,距離登基稱王,相信指日可待!

高比破得分紀錄唔開心

騎士昨仗賽前收到壞消息,占士個好拍檔莫威廉士因為扭傷肩部,需要休戰一個月,不過少少打擊又點會阻到「大帝」發威,佢全場交出37分同9個籃板,主宰球賽。對於季內兩挫湖人,占士卻提醒隊友唔可以放鬆:「贏佢哋兩場其實冇乜大不了,講到尾最關鍵係你要喺總決賽擊敗佢哋。」

冇咗莫威廉士,占士隊友今仗都算交足功課,華拿祖喺最後20秒射入3個罰球,大前鋒希臣攞到14個籃板,以及堅守內線交出13分嘅奧尼爾,其實都應記一功。反觀湖人嘅高比仔今仗雖然射入31分,但下半場15投只得4中,中鋒加素頭3節只得33%命中率,全場僅得13分,自然難有勝望。

用敗仗揭開連續8仗作客嘅地獄賽程,對湖人確係唔好兆頭。高比仔雖然喺第2節射入罰球,以31歲151日年紀,早33日打破由名宿張伯倫保持嘅最年輕取得25,000分球員紀錄,但佢賽後就認唔滿意隊友唔夠硬淨。講番聽日賽事,騎士氣勢如虹,聽朝主場迎戰雷霆只係小讓6分,上盤值得捧場。

白蘭芝