23/01/2010

播放本新聞相關短片

巴特爾圍城當入樽

近排電影《十月圍城》喺中港兩地大獲好評,戲中每個角色都令人留下深刻印象。唔知大家有冇覺得飾演「王复明」嘅和尚熟口熟面呢?無錯!佢就係史上首位奪得NBA總冠軍嘅中國球員巴特爾。佢喺戲裏戲外都有出色表現,絕對係中國人心目中「永恒嘅英雄」!

睇完《十月圍城》後,好多人都讚巴特爾演技自然。其實呢位中國籃球員,早喺08年已經拍過一套叫《蔚藍色的杭蓋》嘅電影,當時巴特爾飾演一個已經退休嘅柔道選手,但巴特爾話當時乜嘢都唔識,只係抱住玩嘅心態去拍,套戲最後亦只喺佢朋友堆入面播過。不過睇過嘅人,都話套戲好感人,甚至喊足超過8分鐘,成為巴特爾獲邀參演《十月圍城》嘅其中一個原因。

甄子丹黎明等佢埋位

其實巴特爾當初知道要同甄子丹、謝霆鋒同黎明等大明星拍戲,以為導演陳德森同佢講笑:「我第一次見導演,我同佢開玩笑:『導演,我得唔得㗎?唔好阻住你哋拍戲呀!』」不過巴特爾經過再三考慮,終於畀劇組誠意感動:「陳德森導演嚟現場睇我比賽,同我講:『巴特爾,做番你自己就得!』」。

事後監製陳可辛亦覺得搵啱人:「嗰時我哋一早搵咗黎明同甄子丹,仲諗過搵郭富城,再搵一個同佢差唔多級數嘅男星,但戲份好少,我覺得唔係咁好,當時啱啱睇完《魯豫有約》(一個電視訪談節目),覺得巴特爾好有魅力,於是就搵佢。巴特爾雖然好高,幾嚇人,但其實佢係一個好可愛嘅人。」不過巴特爾就曾經因為檔期問題,令甄子丹同黎明等大明星要等佢埋位,陳可辛話:「我哋套戲一半都拍完,但巴特爾仲打緊聯賽(上季CBA總決賽),我哋當時冇諗到佢嘅球隊成績會咁好。」

《十月圍城》籃球化

不過最後巴特爾都係拍得成,喺戲中使出嘅「擲帽子」同「扔椰子」仲令人眼前一亮,巴特爾話呢啲都係動作指導根據佢嘅特點而設計,等佢覺得好似打緊籃球:「我覺得拍戲同打籃球有好多相通嘅地方,好似擲帽子同籃球入面嘅單手投籃差唔多,而扔椰子就係我喺球場上入樽嘅寫照。」

之後巴特爾更將《十月圍城》「籃球化」:「我同甄子丹等5個演員喺電影打嘅就係聯防,保護孫中山嘅時候,我喺後面殺敵,咁樣同叫我打後衞有咩分別?於是拍完戲後,我同導演講佢布局不當,不過導演同我講,喺後面唔叫打後衞,係叫壓軸。」

巴特爾7件事

‧8歲已經高1.88米,10歲加入蒙古籃球隊,成為專業球員,但由於唔慣同陌生人生活,之後多次偷走返屋企。

‧早喺1999年3月,太陽曾經請巴特爾試訓,但由於時差問題,巴特爾發揮唔出水準,之後佢曾經去咗意大利嘅特雷維索跟練。

‧喺02年2月加盟金塊,3月3號對住當時有王治郅効力嘅小牛,據講有超過8億中國觀眾收睇。

‧喺第2場NBA已經獲得正選,成為第1位喺NBA獲得正選嘅中國球員。

‧現任老婆係德明,比巴特爾大10歲,同巴特爾結婚前,已經有兩個女,大女比巴特爾只細12歲,依家喺芝加哥伊利諾伊州州立大學Year 3讀緊體育市場營銷,二女巴仁娜同細仔巴恩澤都喺休斯敦返學。

‧儘管未曾効力過火箭,但巴特爾喺04年舉家搬去休斯敦嘅糖城,老婆同仔女依家都住喺嗰度。據講間屋樓高3層,「大巴」將自己喺美國嘅屋企稱為「休息嘅港灣」。

‧雖然嗰樣好惡,但據講巴特爾96年情人節,向德明送咗一支鐵玫瑰。雙方關係目前頗好,全賴雙方有個「君子協定」,允許雙方鬧交,但生氣限定5分鐘。另外邊個錯先邊個就要罰錢,分5個檔次,最少5蚊,最多20蚊。結婚8年之後,巴特爾受罰總數大約佔三分二。

永恒英雄有名你叫

巴特爾喺《十月圍城》中為保護孫中山而犧牲,成為大英雄,其實佢喺現實中,本身就係為英雄而生,事關佢嘅全名,孟克.巴特爾(Mengke Bateer),孟克,喺蒙古語解作「永恒」,而巴特爾就解作「英雄」。

巴特爾Mengke Bateer

位置:中鋒 花名:大巴

身高:208cm 體重:131.5kg

國籍:中國 出生地點:新疆廣匯

出生日期:1975年11月20日(34歲)

曾効力球會:

中國北京首鋼(1994-2002)

美國丹佛金塊(2002)

美國聖安東尼奧馬刺(2002-2003)

美國多倫多速龍(2003-2004)

美國奧蘭多魔術(2004)

美國紐約人(2004)

美國亨利維爾飛行隊(2004)

中國北京首鋼(2006-2007)

俄羅斯莫斯科斯巴達雄象(2007-2008)

中國新疆廣匯飛虎(2008-現在)

曾奪榮譽:

NBA總冠軍(2003)

CBA總冠軍(2008)

8次入選CBA全明星陣容

09年CBA常規賽MVP

朱楓