23/01/2010

播放本新聞相關短片

占士再贏高比做票王

球場內打敗高比拜仁,球場外勒邦占士再一次將呢個宿敵擊敗!佢喺尋日公布嘅2010年NBA明星賽正選名單中,以近255萬選票力壓高比成為票王。更犀利嘅係,占士仲成為NBA史上首位3度得票超過250萬嘅球員,連「波神」米高佐敦都未試過!

拿殊踢走麥基迪入選

歷來第6次入選明星賽嘅「大帝」表示:「球迷鍾意我每晚所做嘅一切,好感激佢哋揀我做明星賽正選。」同勒邦占士一齊做東岸正選後衞嘅,仲有今季養傷多過打波嘅76人球星艾佛遜,佢話會視乎膝傷康復程度先決定係咪參賽。

西岸方面,拿殊嘅得票總算趕過今季僅打6場波嘅麥基迪,避免咗家陣「放假」嘅T-Mac尷尬入選情況。今年明星賽會喺香港時間2月15日,响美國德州阿靈頓市嘅牛仔體育場舉行,至於由兩軍教練挑選嘅後備名單,則會喺今個月29日公布。