有咩好得過贏波兼剝人牙骹呢？山貓尋日喺主場憑住強勁嘅防守，將熱火嘅全場投射命中率壓抑至只有2成9，最後仲以104:65大勝，取得球會成立以嚟最大分差勝仗！難為熱火前鋒比士利之前牙斬斬話贏波冇難度，依家咪瘀爆囉！

創球會最大分差勝仗

熱火前鋒比士利賽前受訪時曾大言不慚咁話：「只要我哋表現團結同喺比賽期間專注，要贏山貓應該唔難！」呢番說話明顯激起山貓球員鬥志，佢哋今仗喺防守上表現落力，除咗緊盯比士利令佢只有11射3中、僅得6分嘅慘淡成績外，熱火全場嘅投射命中率亦低至2成9！

除咗防守出色，山貓亦有賴史堤芬積遜同謝勒華萊士合共攻入44分，最後球隊以104:65大炒熱火，當中淨勝39分嘅差距仲係球會成立以嚟最大分差勝仗！經已取得6連勝嘅山貓聽朝將會作客鷹隊，以佢哋咁着重防守嘅表現嚟睇，隨時令鷹隊難以得分，一於玩細盤啦！

高比仔冧莊膺賣衫王

另外，NBA尋日亦公布新一季「賣衫王」排名榜，湖人巨星高比拜仁力壓騎士「大帝」勒邦占士，成功冧莊第1名。球隊方面同樣以湖人嘅球衣最受球迷歡迎。