恭喜晒奧尼爾！「巨無霸」奧尼爾尋日代表騎士主場對速龍成功突破得分28,000分呢個大關，成為NBA史上第5人，不過賽後佢就話有啲遺憾，話自己如果唔係之前射失太多罰球，一早已經達到呢個里程碑。

奧尼爾尋日開賽僅一分鐘就已經成功上籃得分，成為渣巴（38,387分）、馬龍（36,928分）、米高佐敦（32,292分）同張伯倫（31,419分）後，NBA史上第5位攞到28,000分或以上嘅球員，最終奧尼爾全場射入16分，帶領騎士主場以108:100刺死速龍。

騎士孖寶弗爆夾擊湖人

對於達到呢個里程碑，奧尼爾表示感到好驕傲，但亦感到遺憾，覺得依家先達到呢個分數實在有啲過遲：「粗略估計，我喺NBA至少射失5,000個罰球，如果我可以至少射入一半以上，我諗我依家已經有30,000分。」

NBA常規賽周五賠率

東西岸排名

其實尋日除咗奧尼爾，「大帝」勒邦占士都好搶鏡，獨得28分、9個籃板同11次助攻，如果唔係完場前嘅手邊溜走籃板，就可以取得「三雙」。聽朝NBA將會上演聯盟一哥大戰，由騎士主場硬撼湖人，以騎士孖寶目前嘅狀態，絕對有力夾手夾腳做低高比拜仁，小讓3分上盤玩得過！