19/01/2010

播放本新聞相關短片

「龍王」保殊劏牛爭埋好埠

本文重點

距離轉會窗關閉愈嚟愈近,好多今季尾將會約滿嘅NBA球星,近期都打得特別落力爭取轉會,好似保殊尋日就大發神威,帶領速龍主場大炒小牛110:88,難怪有傳雷霆都加入火箭同湖人嘅戰團,爭奪「龍王」加盟。聽日速龍作客騎士受讓8分,下盤絕對值得一試。

速龍近期成績穩步上揚,尋日主場更以22分之差大破小牛,取得自01年雙方交手最大差距勝仗。當中中鋒保殊大顯神威,個人獨取23分同13個籃板,單喺第二節就射入11分,賽後保殊表示:「無論去到邊我哋都想贏波,今晚絕對係一場偉大嘅勝仗。我哋準備充足,對於一班隊友有咁好嘅表現,我真係感到好驕傲。」

雷霆加入戰團

其實環顧目前NBA,內線好手真係唔多,難怪今季尾就同速龍滿約嘅保殊,近期成為轉會場上嘅搶手貨。速龍已開始計劃喺2月18號NBA轉會窗關閉前將保殊換走,以免季尾兩手皆空。《NBA官網》籃球專家加西亞尋日就披露,繼火箭同湖人後,雷霆都對保殊好有興趣,而且出手比以上兩間球會仲要高,好大機會後來趕上。

為咗爭取更好嘅合約,保殊嚟緊肯定加多兩錢肉緊,聽日作客騎士,正好係表現身價好機會,話唔埋贏埋騎士都未定。

勒邦芝士