本文重點
新一代熱火助攻王誕生！熱火尋日作客雖然以80:98不敵雷霆，不過靈魂人物韋迪是役造出6次助攻，職業生涯累積助攻次數達2,869次，打破名將添夏達威為熱火所保持嘅總助攻紀錄，總算係雖敗不辱吖！
80:98不敵雷霆
其實熱火今仗已經有比士利獨取28分，加埋韋迪貢獻24分及6次助攻，可惜都無法助球隊扭轉敗局。歸根究柢在於對手雷霆有杜蘭特大勇，佢全場18次起手入14球取得36分，連韋迪都話擋唔住佢：「以杜蘭特6呎9吋嘅高度，當佢要出手實在無幾多人有能力阻止到。」最後熱火亦以80:98輸波。
雖然輸波，不過韋迪都攞番個安慰獎，原來連同佢今仗交出嘅6次助攻在內，個人職業生涯助攻次數達2,869次，令佢壓過前熱火球員添夏達威成為球會助攻紀錄保持者。至於贏波嘅雷霆聽朝作客鷹隊，兩隊同屬火力唔錯嘅隊伍，大盤可以考慮！
