雖然有「大帝」勒邦占士射入36分，可惜騎士尋日仍然臨尾香，被爵士嘅「無名小卒」喺最後時刻射入一個3分波，作客反輸爵士96:97。聽日騎士會喺西岸之旅最後一站賽事作客快艇，相信必力求反彈，不勝無歸，少讓3分上盤捧得過！

騎士主將勒邦占士尋日打到上晒身，第4節更射入全場36分中嘅20分。完場前32秒，騎士仲咧住爵士6分，不過爵士之後把握騎士頻頻射失罰球，憑喺第4節代替傷出嘅迪倫威廉士、打控衞嘅加尼斯喺完場前失去平衡射入一個3分波，奇迹以1分反勝。

綽號「Yata」嘅加尼斯，其實只係今年新秀，上個禮拜先加盟爵士簽咗10日約，尋日只係打第5場NBA賽事，就射入職業生涯首個3分波。賽後呢名無名小卒high到爆：「我知道如果我攞到波，就一定要勇往直前。當我出手一刻就知呢球係靚波，可以擊敗騎士，絕對係一場偉大嘅勝利。」

輸埋呢場後，騎士暫時喺西岸之旅錄得2勝2負，聽日佢哋將會喺最後一站賽事作客快艇，以勒邦占士嘅勇態，怕且快艇好難再好似爵士咁好彩，騎士有力贏波畫上完美句號。