亞連拿斯單「藏槍案」係今期NBA熱話，雖然當地警方仲調查緊單Case，不過「Agent Zero」仲未知驚，喺前日對76人場波玩出禍，卒之激嬲NBA行政總裁史端，被罰無限期停賽，累巫師尋日大敗畀騎士98:121。

影合照擺開槍甫士

話說前日巫師擊敗76人，賽前亞連拿斯同隊友影大合照嘅時候，竟然擺個開槍「甫士」，過程畀場邊個攝錄機拍低晒，斷正！眾所周知，NBA行政總裁史端最緊張聯盟形象，佢老人家尋日諗都唔諗，宣布將亞連拿斯無限期停賽兼停薪，據華盛頓唔少網站揣測，呢位巫師球星今季已經玩完，唔使旨意再有份落場。

巫師本身已經唔係勁，冇埋「Agent Zero」就仲大鑊，尋日造訪騎士可謂毫無還擊之力。勒邦占士打咗半個鐘就攻入23分、交出8次助攻同搶到7個籃板，加上騎士全隊有6位球員得分達雙位數，最後大勝巫師121:98。巫師呢期咁濕滯，聽朝對住強旅魔術隨時再輸鑊甘，作客嘅魔術讓4分，上盤要捧！